Արու առնետները գերադասել են «հագնված» էգերին. 1in.am

Ամերիկացի նյարդակենսաբաններն առնետների արուներին սովորեցրել են հատուկ «ժակետ» հագած էգերին նախընտրել, որը կրծկալ է հիշեցնում: Այդ փորձի մասին գիտնականները հայտնել են այս տարվա նոյեմբերին Վաշինգտոնում անցկացված Նյարդակենսաբանների միության ամենամյա հանդիպման ժամանակ, իսկ հետազոտության մասին կարճ հայտնում է livescience.com ռեսուրսը:

Գիտնականները փորձեր են կատարել էգ և արու առնետների 12 զույգով: Սկզբում մասնագետներն արուներին թույլ են տվել զուգավորվել միայն հատուկ կերպ հագնված էգերի հետ: Հետո արուներին ընտրության հնարավորություն է տրվել՝ զուգավորվել բնական տեսքով էգի հետ կամ «կրծկալով ընկերուհի» ընտրել: Պարզվել է՝ արուներն ընտրել են հագնված էգերին:

Բացի դրանից՝ այդպիսի էգերի հետ արուների սեռական ակտի ինտենսիվությունն ավելի բարձր է եղել, քան սովորականների հետ: Սրա պատճառները գիտնականները փնտրել են արուների գլխուղեղում հատուկ գեների ակտիվության մեջ:

Դրա համար արուների գլխուղեղ է ներմուծվել գունային պիգմենտ, որը ցույց է տվել, որ հագնված էգերի հետ զուգավորվող արուների դեպքում ավելի բարձր է c-Fos գենի ակտիվությունը, քան մնացածների դեպքում: Համարվում է, որ այդ գենը կապված է հաճույքի կենտրոնում նեյրոնային ակտիվացման հետ:

Հարցեր, պատասխաններ, մեկնաբանություններ